02 (24)

ලෝක ආර්ථීක අර්බුදය හමුවේ අපේ රටට ද කුමන ආකාරයේ ආර්ථීක අභියෝගවලට මුහුණදීමට සිදුවුවද දිළිඳු ජනතාවගේ සුබසාධනය වෙනුවෙන් රජය ප්‍රමුඛත්වය ලබා දී තිබෙන බව ජනාධිපතිතුමා පැවසීය.

ජනාධිපති ගරු මෛත්‍රීපාල සිරිසේන මැතිතුමා මේ බව ප්‍රකාශ කළේ අද (28) පෙරවරුවේ කොළඹ මහබැංකු ශ්‍රවණාගාරයේ පැවති තිරසර මුල්‍ය පිළිබඳ වැඩමුළුවේ සමාරම්භක සැසිය අමතමිනි.

අපේ රටේ සියයට 30 ක පමණ ජනතාවක් බරපතළ ආර්ථීක අපහසුතාවයන්ට මුහුණදී සිටින අතර ඔවුන් වෙනුවෙන් 2017 වසර දුගී බව තුරන් කිරීමේ වසර ලෙස රජය ප්‍රකාශයට පත් කර තිබෙන බව මෙහිදී සඳහන් කළ ජනාධිපතිතුමා එම වැඩපිළිවෙළ සාර්ථක කර ගැනීමට මූල්‍ය ක්ෂේත්‍රයේ සියලූදෙනාගේ සහය අපේක්ෂා කරන බව කියා සිටියේය.

ආර්ථීක ගැටලූ ජය ගැනීමේදී පරිසර සංරක්ෂණය ද ඉතා වැදගත් බව පෙන්වා දුන් ජනාධිපතිතුමා තිරසර සංවර්ධන ප්‍රතිපත්ති කළමනාකරණය පිළිබඳ සෑම ක්ෂේත්‍රයකම විද්වතුන්ගේ සහ ප්‍රවීණයිනගේ මගපෙන්වීම අත්‍යාවශ්‍ය බව ද කියා සිටියේය.

පරිසර ඇගයීම සමග භෞතික සම්පත් සංවර්ධනය මුල්කරගත් ඉදිරි සංවර්ධන කාර්යයන්හි මූල්‍ය ප්‍රතිපත්ති හා කළමනාකරණය ඉතා සාර්ථක මගක ගමන් කළයුතු බව පෙන්වා දුන් ජනාධිපතිතුමා මහ බැංකුව ඇතුළු මූල්‍ය ආයතන, පරිසර අමාත්‍යාංශය හා පරිසර සංරක්ෂණයට අදාළ අනෙකුත් ආයතන සමග ඒකාබද්ධ වූ ජාතික වැඩසටහනක් ක්‍රියාත්මකවීමේ අවශ්‍යතාවය ද පෙන්වා දුන්නේය.

ශ්‍රී ලංකා මහ බැංකුව ජාත්‍යන්තර මූල්‍ය සමායතනය සහ තිරසර බැංකු ජාලය සමග ඒකාබද්ධව මෙම වැඩමුළුව සංවිධානය කර තිබෙන අතර මහ බැංකු අධිපති ආචාර්ය ඉන්ද්‍රජිත් කුමාරස්වාමි මහතා ද, ජාත්‍යන්තර මූල්‍ය අරමුදලේ සහ ලෝක බැංකුවේ නියෝජිතයින් සහ දෙස් විදෙස් මූල්‍ය ක්ෂේත්‍රයේ ප්‍රවීණයින් සහ විද්වතුන් පිරිසක් මෙම සමාරම්භක සැසියට එක්ව සිටියහ.

01 (30) 03 (20) 04 (16) 06 (14) 07 (14)

 

© 2017 - ශ්‍රී ලංකා ජනාධිපති කාර්යාලය