03 (38)

මඩ ගා ගත් සාම්ප‍්‍රදායික කෘෂිකර්මාන්තයේ නොව ජංගම දුරකතනයෙන් සහ අන්තර්ජාලය ඔස්සේ වෙළදපොළ සමග සම්බන්ධ වෙමින් අපනයන වෙළදාම හා එක්වීමේ අවස්ථාව අද මේ රටේ තරුණ පරපුරට උදා කර දී තිබෙන බව ජනාධිපතිතුමා පැවසීය.ඒ සදහා අවශ්‍ය ණය පහසුකම් ලබාදීමට මෙන්ම මග පෙන්වීම් සිදු කිරීමට ආයතන රාශියක් තිබෙන බව ද සදහන් කළ ජනාධිපතිතුමා මේ රටේ කෘෂිකර්මාන්තය ශක්තිමත් කරමින් අලූත් ගමනක් යාමට අද තරුණ පරපුරට අවස්ථාව උදා වී ඇති බව ද කියා සිටියේය.ජනාධිපති ගරු මෛති‍්‍රපාල සිරසේන මැතිතුමා මේ බව ප‍්‍රකාශ කළේ ආහාර නිෂ්පාදන ජාතික වැඩසටහන හා සමගාමීව ගොවි සංවිධාන වෙත නොමිලේ කෘෂි උපකරණ බෙදාදීම වෙනුවෙන් අද (08) පස්වරුවේ අනුරාධපුර මහජන කි‍්‍රඩාංගනයේ පැවති උත්සවය අමතමිනි. ගොවි ජනතාව අතර නවීන තාක්ෂණය භාවිතා කිරීම ප‍්‍රචලිත කිරීමේ ආරම්භක පියවරක් ලෙස පළාත් 09 ම නියෝජනය කරන ගොවි සංවිධාන වෙත කෘෂි උපකරණ බෙදාදීම මෙහිදී සිදු විය.

ගොවි ජනතාව ණය බරින් නිදහස් කර ගනිමින්, ඔවුන්ගේ ආර්ථිකය ශක්තිමත් කර රටේ කෘෂිකර්මාන්තය ගොඩනැගීමටනම් මෙරට ගොවි ජනතාව නවීන තාක්ෂණය සමග බද්ධ විය යුතු බව මෙහිදී පැවසූ ජනාධිපතිතුමා ඒ සදහා අවශ්‍ය වැඩපිළිවෙළ මේ වන විට රජය සකසා තිබෙන බවද කියා සිටියේය.රටේ අනාගත සංවර්ධන ඉලක්ක සපුරා ගත හැක්කේ සෑමවිටම රටේ කෘෂිකර්මාන්තය දියුණු කිරීමේ සැළසුම් සහ ඉලක්ක තුළින් බවද පැවසූ ජනාධිපතිතුමා තමා කෘෂිකර්ම අමාත්‍යවරයා ලෙස සිටියදී ආහාර අර්බුදය සදහා මුහුණ දෙමින් ආහාර නිෂ්පාදනය ඉහළ නැංවීමට ආරම්භ කළ අපි වවමු රට නගමු ව්‍යාපෘතියේ සාර්ථකත්වය පිළිබදව ද අදහස් දැක්වීය.නමුත් 2013 වසරේ බරපතළ නියගයකට මුහුණ දීමට සිදුවූ අතර ඒ සමග පැමිණි පළාත් පාලන මැතිවරණයේදී මැතිවරණ වේදිකාව උණුසුම් වුයේ නියගයෙන් පීඩාවට පත් ජනතාවට සහන සැලසීම පිළිබදව බව ද සිහිපත් කළ ජනාධිපතිතුමා එහිදී හිටපු නායකයින්ගේ උපදෙස් අනුව ඡුන්ද පොරොන්දු රාශියක් ලබා දෙමින්, පත්තර පිටු පුරවා දැන්වීම් පළ කළද එම පොරොන්දු කිසිවක් මැතිවරණයෙන් අනතුරුව ඉටු නොවූ බවද කියා සිටියේය.

පසුගිය සමයේ ඇති වූ නියං තත්ත්වය හමුවේ පීඩාවට පත්වූ ජනතාවට සහන සැළසීම වෙනුවෙන් වත්මන් රජය ඉතා සැළසුම්සහගත සහ කාර්යක්ෂම අයුරින් කටයුතු කළ බව සදහන් කළ ජනාධිපතිතුමා එය නියං තත්ත්වයක් හමුවේ පීඩාවට පත් ජනතාව වෙනුවෙන් සහන සැළසීමට කි‍්‍රයාත්මක වූ වැඩිම සහනදායී වැඩපිළිවෙල බව ද කියා සිටියේය.ගොවි පුතෙක් ජනාධිපති වුවත් ගොවීන්ට නොසලකන බවට එල්ල වන චෝදනා පිළිබදව ද අදහස් දැක්වූ ජනාධිපතිතුමා කියා සිටියේ ගොවි ජනතාව සහ කෘෂිකර්මාන්තය පිළිබද අත්දැකීමක් මෙන්ම සැබෑ අවබෝධයක් තමාට තිබෙන බවත්, නවීන තාක්ෂණය සමග බද්ධ වෙමින් ණය බරින් නිදහස් වූ මෙන්ම, ආර්ථිකය ශක්තිමත් වූ ගොවි පරපුරක් රට තුළ ගොඩනැගීමට ඉතා සැලසුම් සහගත අයුරින් කටයුතු කරන බවත්ය.

ගොවි සංවිධාන වෙත පාරිතෝෂිත මුදල් පිරිනැමීම, පසු අස්වනු තාක්ෂණ ආයතනයේ සේවකයින්ට දීර්ඝ සේවා උපහාර තිළිණ පිළිගැන්වීම, පසු අස්වනු තාක්ෂණ ආයතනය මගින් කි‍්‍රයාත්මක පුහුණු වැඩසටහන්වල ප‍්‍රතිලාභින්ට සහතික පත් ප‍්‍රදානය, කාබනික පොහොර නිෂ්පාදනය සදහා උපකරණ බෙදාදීම, සාර ලංකා ණය ප‍්‍රදානය කිරීම ඇතුළු වැඩසටහන් රැුසක් මෙහිදී ජනාධිපතිතුමාගේ ප‍්‍රධානත්වයෙන් සිදු විය.
කෘෂිකර්ම අමාත්‍ය දුමින්ද දිසානායක, ඇමතිනි චන්ද්‍රානි බණ්ඩාර, උතුරු මැද පළාත් ආණ්ඩුකාර පී.බී. දිසානායක යන මහත්ම මහත්මීන් ඇතුළු මහජන නියෝජිතයින් පිරිසක් ද කෘෂිකර්ම අමාත්‍යාංශයේ ලේකම් ඞී. විජයරත්න මහතා ඇතුළු රාජ්‍ය නිලධාරින් මෙම අවස්ථාවට එක්ව සිටියහ.
02 (44)

04 (31)

06 (25)

07 (25)

08 (23)09 (20)

10 (20)

11 (23)

12 (15)

13 (16)

14 (10)

15 (4)

16 (8)

 

© 2017 - ශ්‍රී ලංකා ජනාධිපති කාර්යාලය