01

70 වන නිදහස් දින සැමරුම් උළෙලේ ප‍්‍රධාන ආරාධිත අමුත්තා ලෙස සහභාගීවීමට දිවයිනට පැමිණි වෙසෙක්ස්හි අර්ල්වරයා වන එඞ්වර්ඞ් කුමරු සහ සොපී කුමරිය ඇතුළු නියෝජිත පිරිස අද (04) අද දහවල් ජනාධිපති කාර්යාලයේදී ජනාධිපතිතුමා හමුවිය.

ජාතික නිදහස් දින සැමරුම් උත්සවයෙන් අනතුරුව මෙම හමුව සිදුවූ අතර ජනාධිපති ගරු මෛතී‍්‍රපාල සිරිසේන මැතිතුමා සහ එම මැතිණිය විසින් මෙහිදි එඞ්වර්ඞ් කුමරු සහ එම කුමරිය උණුසුම් ලෙස පිළිගනු ලැබීය.

බි‍්‍රතාන්‍ය රජ පවුල වෙත කරන ලද ආරාධනය පිළිගෙන නිදහස් දින සැමරුම් උළෙලට සහභාගීවීම පිළිබද මෙහිදී එඞ්වර්ඞ් කුමරු වෙත සිය ස්තූතිය පළ කළ ජනාධිපතිතුමා 1954 වසරේ සිදුවූ බි‍්‍රතාන්‍ය මහ රැජිණගේ ශ‍්‍රී ලංකා සංචාරය සහ චාර්ල්ස් කුමරු ඇතුළු බි‍්‍රතාන්‍ය රජ පවුලේ සාමාජිකයින් මීට පෙර ශ‍්‍රී ලංකාවේ සිදුකරන ලද සංචාර පිළිබදව ද සිහිපත් කළේය.

නිදහසින් පසු බි‍්‍රතාන්‍ය සහ ශී‍්‍ර ලංකාව අතර සබදතා ඉතා හොදින් වර්ධනය වී ඇති බව පෙන්වා දුන් ජනධිපතිතුමා බි‍්‍රතාන්‍ය රජයේ අනුග‍්‍රහයෙන් ඉදිකරන ලද මෙරට විදුලි බල උත්පාදනයෙහි ඉතා සුවිශේෂි හැරවුමක් වන වික්ටෝරියා ජලාශය අද ශී‍්‍ර ලංකාවේ ජාතික ආර්ථිකයට විශේෂී දායකත්වයක් සපයන බව කියා සිටියේය.

2015 වසරේ සිදුකළ තම බි‍්‍රතාන්‍ය සංචාරයේදී දෙවන එළිසබෙත් මහ රැජිණ හමුවූ අවස්ථාව ද මෙහිදී සිහිපත් කළ ජනාධිපතිතුමා එහිදි ලැබුණු සුහද සහ හෘදයාංගම පිළිගැනීම කෘතවේදීව සිහිපත් කළේය.

මෙහිදී අදහස් දැක්වූ එඞ්වර්ඞ් කුමරු ප‍්‍රකාශ කළේ ශී‍්‍ර ලංකාවේ සංචාරයක නිරතවීමට ලැබීම සහ විශේෂයෙන් 70 වන නිදහස් දින සැමරුමට සහභාගීවීමට ලැබීම පිළිබද තමා බෙහෙවින් සතුටු වන බවයි.

නිදහස් දින සැමරුම් උළෙලේදී ජනාධිපතිතුමා විසින් සිදුකරන ලද කතාව ද අගය කළ එඞ්වර්ඞ් කුමරු ජාතියේ අනාගතය සැමවිටම ශක්තිමත් වන්නේ උගතුන් වැඩිවූ රටක බවත් ඒ සදහා අධ්‍යාපන ප‍්‍රතිසංස්කරණවල කාර්යක්ෂමතාවය, අධ්‍යාපන ප‍්‍රතිපත්ති සහ සැලසුම් අදට ඔබින ආකාරයට සකස් කරන බවටත් ජනාධිපතිතුමා කළ ප‍්‍රකාශය සිහිපත් කරමින් එංගලන්තය සහ ශ‍්‍රී ලංකාව අතර අධ්‍යාපන ක්ෂේත‍්‍රය තුළ විශේෂ සම්බන්ධතාවයක් පවතින බව කියා සිටියේය.

මෙම වසරේදී බි‍්‍රතාන්‍යයේ පැවැත්වෙන පොදු රාජ්‍ය මණ්ඩලයීය සමුළුවේදී නැවත හමුවීමට ද මෙහිදි එකගතාවය පළ කෙරිණි. පොදු රාජ්‍ය මණ්ඩලය නියෝජනය කරන සෑම රටකම අගනුවර පරිසර හිතකාමී ඇවිදන මංතීරු ව්‍යාපෘතියක් කි‍්‍රයාත්මක කිරීමේ වැඩපිළිවෙළ යටතේ කොළඹ නගරයේ ද එම මංතීරු ව්‍යාපෘතීය ඉදිකිරීමට අදාළ සංකේතය මෙහිදී එඞ්වර්ඞ් කුමරු විසින් ජනාධිපතිතුමා වෙත පිළිගැන්වීය.

මේ අතර 70 වන නිදහස් දින සැමරුම් උත්සවයට සහභාගීවීමට දිවයිනට පැමිණි ජපාන අග‍්‍රාමාත්‍යවරයාගේ විශේෂ නියෝජිත එරට ඉදිකිරීම් කටයුතු අමාත්‍ය ජපාන ශී‍්‍ර ලංකා මිත‍්‍රත්ව පාර්ලිමේන්තු කණ්ඩායමේ සභාපති Wataru Tokeshita මහතා ද අද ජනාධිපති කාර්යාලයේදී ජනාධිපතිතුමා හමුවිය.

ශී‍්‍ර ලංකාව සහ ජපානය අතර පවතින ඓතිහාසික මිත‍්‍රත්වය මෙහිදී සිහිපත් කෙරුණු අතර, ඉදිරියේදී තවදුරටත් එම සබදතා වර්ධනය කර ගැනීම පිළිබද සාකච්ජා කළහ.

මේ අතර නිදහස් දින සැමරුම් උළෙලට සහභාගීවීමට දිවයිනට පැමිණි චීන මහජන දේශපාලන උපදේශන සභාවේ උප සභාපති Wang Qinmin මහතා ද අද ජනාධිපති කාර්යාලයේදි ජනාධිපතිතුමා හමු වී සුහද කතා බහක නිරත විය.
02 (93)

1 (40)

1 (41)

 

© 2017 - ශ්‍රී ලංකා ජනාධිපති කාර්යාලය